張曦雯專訪｜《臥底嬌娃》挑戰蠢萌千金反差人設 大吐女團跳唱拍攝苦水.熱播劇《臥底嬌娃》中，張曦雯（Kelly）擔正女主角，以臥底身份偽裝成女團成員，同拍檔陳瀅、羅毓儀組隊潛伏查案，大晒同以往專業人士熒幕形象極大反差的喜感，為觀眾帶來不少歡樂。日前Kelly接受專訪，大談拍攝呢部女團主題劇集的點滴，仲分享咗自己對角色演繹的心得。
講到今次拍攝女團主題劇集最大的難關，Kelly直言全程都充滿挑戰：「成件事都好難！我哋本身係演員，Yuki有唱歌經驗，已經贏咗一大截。對我嚟講，平時登台都算應付到，但真係要學新歌、練歌，短時間內又要排舞、又要開工拍劇，真係幾辛苦。」
談到當初接到角色的感受，Kelly笑言自己都唔似係監製的首選：「可能係監製想俾個挑戰我。因為網民成日話我好似做唔到比較蠢嘅角色，可能睇落太聰明，所以今次呢個角色就係自以為聰明，實際上成日闖禍。仲有網民話我都做唔到窮嘅角色，哈哈！」
Kelly以往多數出演正劇同專業人士角色，上年《俠醫》先罕有嘗試貼地演出，今次再挑戰喜劇，佢就話冇刻意改變自己的演出方式：「我覺得呢個角色搞笑嘅地方，就係好認真咁去做劇本入面寫嘅傻事，只要劇本有呢個元素，我就盡力演岀嚟。」今次佢飾演的千金小姐，個性愛逞強、口唔饒人，成日出岔子，係劇入面的「論盡擔當」，Kelly仲分享：「就好似有場戲，我跟蹤人嘅時候，唔知點樣被燒烤叉篤到pat pat，我單睇劇本都覺得超好笑，就係要咁認真咁做一啲好無聊嘅動作，先有喜感。」
講到同陳瀅、羅毓儀兩位拍檔組成女團合作，Kelly直言一早就好期待：「同Jeannie合作之前，我已經猜到我哋可以做到好朋友，因為大家嘅性格、背景都好相近，都比較爽朗，好多話題都好夾，好容易就明白對方。而Yuki真係超級可愛，係一個好能提供情緒價值嘅朋友，就似身邊永遠有泡泡住一樣，讓人好想去錫佢、愛護佢。」佢仲話，成個拍攝過程同拍檔們有種出生入死的感覺，令大家的默契同化學反應都好咗好多，呢個體驗非常難得。
至於劇入面的跳唱場口，Kelly就笑言自己仲未敢睇成品：「希望播出嘅時候唔好好似攝錄機回放咁樣，有剪輯幫手修一下啦，哈哈！其實劇入面我哋本身就係一隊失敗嘅女團，所以大家覺得我哋唱得唔好、跳得唔好，其實係我哋嘅演技嚟嘅！」TVB
