馬國明預告處男騷「露肉」 蕭正楠曹永廉爆邀老友開騷原因笑爆嘴.蕭正楠（Edwin）與曹永廉（阿廉）上年喺內地多個城市舉辦演唱會，憑住鬼馬幽默的互動同首首經典金曲，反應空前熱烈，成功吸納大批粉絲支持。嚟緊4月，兩人就會殺入佛山開騷，今次更加入新力軍馬國明組成三兄弟陣容，令一眾粉絲期待值直接拉滿！日前三人不僅接受TVB娛樂新聞台獨家訪問，仲專程到佛山做宣傳，獲大批粉絲到場撐場，場面相當墟冚。
講到今次為何會邀請馬國明加盟，蕭正楠同曹永廉就大爆當中有「不得已的苦衷」，搞笑回應直接笑翻網民：「當時我哋一大班人一齊喺佛山開工，我哋兩個正度緊演唱會第一個嘉賓要搵邊個，馬明就喺隔離一路聽住，真係唔好意思唔請佢，唯有焗住請埋佢一齊玩！」
同以往做嘉賓客串登台不同，今次馬國明是以正式歌手身份加盟，成為演唱會的核心主角之一。不過馬明就相當謙虛，笑言自己今次只係負責做「吉祥物」，曹永廉仲即刻補刀玩梗：「仲要係今年馬年專屬吉祥物，絕對應晒景！」三人一來一往的互動鬼馬十足，畫面相當有趣。
今次話晒係馬國明人生首個正式處男演唱會，當然要畀粉絲驚喜，馬明仲語出驚人，預告今次會為個唱「露肉」！正當大家以為佢會大騷弗爆身材之際，佢先解釋，早前睇過《中年好聲音4》入面一眾藝員戴住面具唱歌，自己今次就絕對唔會戴面具，「所以會露出塊面嘅肉」，呢個反轉答案真係估佢唔到，搞笑效果拉滿。
至於今次演唱會的重磅亮點，曹永廉就預告，會準備一連串經典TVB劇集串燒歌，保證可以勾起一眾劇迷的集體回憶；而蕭正楠就笑言，自己最期待的就係快歌環節，皆因從來未睇過馬國明跳舞，呼籲粉絲到場千祈唔好錯過呢個難得畫面。三人仲透露，今次會準備多個驚喜環節，務求畀入場觀眾睇得過癮、聽得開心。TVB
