臥底嬌娃｜陳瀅爆Seed晒喊功青筋暴現 網民憑一細節發現馬貫東暗藏古怪.無綫熱播劇《臥底嬌娃》劇情愈來愈緊湊，11日播出嘅一集入面，陳瀅上演一場超虐心爆喊獨腳戲，層次感十足嘅演技大放異彩，成為全晚焦點所在！劇情講到由陳瀅飾演嘅妙姿，坦白自己同案件其中一名調查對象、李海銅飾演嘅嘉盈原來係生死之交，更苦苦哀求馬貫東飾演嘅奕風，畀自己留低繼續參與調查，可惜最終都被勒令即時退出呢次臥底行動。
大受打擊嘅妙姿飲到酩酊大醉，主動約奕風見面。當奕風扶住佢返屋企休息嘅時候，妙姿攞出自己同嘉盈嘅合照畀佢睇，一邊講一邊眼泛淚光：「呢個女仔嘅死，絕對值得我哋去查清楚。佢係我最好最好嘅朋友，佢叫蘇嘉盈。」
之後妙姿更同奕風剖白自己嘅成長經歷，哽咽住話：「我細細個父母就過身咗，全靠姨媽湊大我，但姨丈成日打我同姨媽。好彩有嘉盈一直喺我身邊，成日陪住我。佢有一種好神奇嘅力量，會令你相信，呢個世界原來仲充滿希望。」
佢愈講愈激動，眼淚終於忍不住崩堤，哭住續道：「其實佢父母好錫佢，佢本來喺一個好幸福嘅家庭長大。佢同父母話好想試下獨立生活，其實只係因為想陪住我，因為佢知道，我根本冇表面睇落咁堅強。」
最後佢更喊到面紅耳熱、連臉上青筋都暴現，崩潰大喊：「警察報告話佢吸毒，先至會從天台跌落嚟。佢根本唔會吸毒㗎！我一定要還佢一個清白！」
呢一幕陳瀅嘅爆喊戲，由一開始眼濕濕強忍情緒，到後來情緒逐漸崩潰淚流滿面，再到最後歇斯底里發泄情緒，喊得極有層次，睇到觀眾都跟住心酸，完全感受到佢同蘇嘉盈之間深厚嘅閨蜜情，唔少網民都大讚陳瀅今次演技大躍進，表現相當驚喜。
除此之外，亦有眼利網民發現關鍵細節——當妙姿同奕風講述自己同嘉盈嘅往事時，馬貫東飾演嘅奕風表情相當古怪，仲睇落似係強忍淚水，令唔少觀眾紛紛猜測佢一早同嘉盈相識。一眾網民即時化身「福爾摩斯」瘋狂留言：「馬貫東個微表情絕對有古怪」、「佢一聽到嘉盈個名，個反應明顯好感觸」、「唔通佢先係嘉盈個隱形男朋友？」
TVB
