入行逾10年的藝人關嘉敏曾「搵朝唔得晚」，經歷捱飯盒、行路省車費及冇錢裝身的苦日子。近期人氣飆升的她終守得雲開見月明，自爆不久將來可上車當業主，「畀得出家用」更令她大感安慰。而其處女短劇正式上架，極有可能成為進駐內地市場的捷徑。
31歲女神關嘉敏（Carman）去年憑無綫戀綜節目《女神配對計劃》人氣急升，工作量短時間內激增數倍，去年收入達7位數，日前她大破慳囊，被發現於太子掃金器！當日Carman在金飾店外Window Shopping，其後索性入內慢慢揀，期間與店員有傾有講，以現時金價每両約5萬元計算，一件金器動輒上萬元，果然富貴！離開金舖後，Carman途經「金魚街」即駐足賞魚，期間被途人認出，她亦有禮地點頭打招呼。及後她抵達花墟，即如蝴蝶般穿梭於不同鮮花之中，最終買下大束心頭好，似乎想趁新正頭催旺桃花人緣，令事業更上一層樓！事後記者致電Carman，她笑着解釋：「嗰日喺太子附近做完嘢，好耐冇行街，咪等自己放吓空囉！（買金喎！）因為有朋友生完BB，睇吓啫！（想行桃花運？）唉！我拍完《女神》都冇景，隨緣啦！真係冇得強求，反而父母心急過我，可能我已經好耐冇拍拖啩。」談到新一年的展望，她直言最想「住洋樓養番狗」：「狗仔我就養緊喇！唔呃你，爸爸想我住好啲，已經開始幫我搵樓，我嘅工作時間唔定，佢對買樓熟啲，況且識得幫我留意埋風水，所以放心交畀佢。」她直言過往收入不穩，令家人擔心：「佢哋見我咁忙，但完全冇收入，擔心我養活唔到自己。（依家畀到家用？）托賴囉！真係好欣慰。」回顧過去的窮日子，她自爆：「女團（Bingo）嗰陣根本唔會有錢置裝，試過買完衫連價錢牌都唔敢剪，影完相就拎去退貨。出街可以行路就行路，慳番幾蚊車錢之餘當減肥，又成日拎住個飯盒出街醫肚，總之慳得就慳，所以呢排買咗好多衫褲鞋襪畀自己，好似報復式補償咁。（唔睇價錢？）又唔會，咁多年習慣咗格價，改唔到。」不過當年即使過住苦日子，她亦沒想過退出：「怨氣一定有，但唔想放棄嘅決心大啲囉！加上我係瞞住屋企人簽約入行，點都要做出成績畀佢哋睇。」擔演短劇攻內地Carman去年到廣州及長沙等地，拍攝首次擔正女主角的古裝穿越短劇《天啊！班主任竟然是武功高強的長公主》，分飾兩角的她扮相宜古宜今，極有可能藉此打開內地市場，該劇近日上架，她加緊宣傳在社交網霸氣留言：「長公主駕到，仲唔快啲跪低！」
