博洛尼亞早段嘅攻勢，唔係柯蘇連尼過唔到條柱，就係杜明基斯過唔到基蒙尼斯守門員歐達路（Emil Audero）嘅十指關。但係兩位中堅卡沙利（Nicolo Casale）同盧坤美（Jhon Lucumi）嘅表現認真災難級，包括柏耶路（Martin Payero）以及華迪在內嘅三個失波全部都係同佢哋甩位有關，而且三個入波都非常「輕鬆」。要知道喺呢一場波之前，伊泰利安奴執教嘅球隊只係喺主場失咗一粒而已。恭喜下梅開二度嘅華迪，今季第7次主力身份上場已經錄得4個聯賽入波，爭下聯賽神射手都唔係無可能。加斯柏連尼繼續收起戴巴拿喺後備，用伊雲費格遜擔任箭頭，效果出來侵略性還係略顯不足。拿坡里方面，干地無論點手頭上嘅可用資源遠遠優於對手係事實，今仗繼續沿用狀態唔錯嘅諾亞蘭治以及尼利斯，後者以今季第3粒聯賽入波（今季累積3球2助攻）報答番領隊對自己嘅信任。賽後佢哋追到同AC米蘭同分，淨勝球輸1粒暫列積分榜次席。意甲第13週賽事賽果-科莫2-0 薩斯索羅熱拿亞2-1 維羅納帕爾瑪0-2 烏甸尼斯祖雲達斯2-1 卡利亞里AC米蘭1-0 拉素萊切2-1 拖連奴比薩0-2 國際米蘭亞特蘭大2-0 費倫天拿羅馬0-1 拿坡里博洛尼亞1-3 基蒙尼斯 🇮🇹
