【明報即時】歐陽震華憶拍《賭場風雲》 讚許紹雄神級演技 感嘆戲如人生 歐陽震華表示許紹雄是他的大師兄，2人正式結片緣是《賭場風雲》。（鍾偉茵攝）許紹雄（Benz雄）今天（18日）出殯，不少圈中好友到靈堂送別Benz雄，有份為好友扶靈的歐陽震華，完成所有儀式後接受訪問，他表示Benz雄是他的大師兄：「佢早我10年，佢（藝訓班）第一期，我第十期，我哋正式結片緣係《賭場風雲》，講我﹑Benz及三哥（苗僑偉），劇中喺3個好兄弟，頭先係靈堂撞到阿戚同三哥，我同三哥有份幫Benz扶靈，跟住阿戚同我講，嗰陣時最開心係睇住我哋幾個拍《賭場風雲》，估唔到好似劇情咁樣，佢（Benz）走咗先，我聽到呢句說話真係...人就係咁簡單，戲如人生，好似我哋3個戲中做3兄弟，戲中Benz雄走咗，套劇都20年前，2005年拍，大家都有情有義，祝佢去一個佢好想去嘅地方。」問可有難忘拍攝回憶？歐陽震華說：「好多，佢（Benz）走嗰日，我喺微博寫咗幾句，我拍《賭場風雲》之前，係覺得自己係主角，可以好多方面懶係獨當一面，但拍《賭場風雲》我對住許紹雄，我簡直無地自容，呢啲先係神，佢做乜嘢都得，做乜都稱職，佢百搭㗎，我頭先喺靈堂同鍾澍佳傾開，我話真係可惜，呢個圈又少咗一位令觀眾睇到五體投地嘅人，有邊套戲﹑邊個劇有Benz雄喺裏面，部劇會定好多，無論收視﹑票房都會定好多，多謝Benz畀到大家咁多歡樂。」問到2人私下相處難忘事？他說：「我哋做呢行好怪，喺部劇好熟好熟好熟，但拍完部劇之後，會有幾多次再見面，呢個唔敢包，我同佢（Benz）以前視藝會足球隊一齊踢波，佢做會長﹑係搞手，我哋嗰陣成日踢波見面，後來個會冇再搞，好多時候喺場合見過面，最近2年都見過。（有沒有聽過他近年身體出現問題？）完全唔知，唔知佢刻唔刻意隱瞞，佢係一個唔想人麻煩佢，佢亦唔想麻煩人嘅一種人，同我差唔多，我都唔鍾意麻煩人，我覺得係咁，我覺得佢心態上好開朗豁達，覺得個個人都會行呢條路，睇下邊個上車及落車先。（最後一次私下聚會？）成年之前喇﹗（收到消息好突然？）收到（黎）芷珊Call我﹑阿佘Call我，我咪即刻去養和，唔係放低工作，嗰日我啱啱瞓醒，就落去睇下，咁嚴重，我都晴天霹靂，之前睇片見佢同個女打機，所以珍惜眼前人﹑珍惜現在，開開心心。」（即時娛樂）
