陳凱琳回應加盟《浪姐7》傳聞 坦言唱跳非強項已搵鄭嘉穎取經.陳凱琳今日以品牌大使身份出席口腔護理活動，受訪時首度正面回應網傳獲邀加盟內地人氣綜藝《乘風破浪的姐姐》第七季（簡稱《浪姐7》）的消息，成為全場焦點。
對於坊間熱傳的加盟消息，陳凱琳直言目前仍在等候最終安排：「而家仲等緊消息，因為有好多因素同變數，當然如果真係有得去，我自己都會好期待。而家最重要係保持平常心，等後續消息出咗，再睇下點樣處理。」被問到會否暗中備戰、提前操fit狀態，她就笑言未有刻意為身材下苦功，反而優先做好體能儲備：「始終唱歌跳舞真係唔係我嘅強項，如果真係去到節目，我好希望可以藉呢個機會，向一班好厲害的前輩、專業老師學習多啲，無論唱歌定跳舞都好，呢個絕對係一個好好的學習環境。」
她更自爆已經率先向老公鄭嘉穎取經，請教參加綜藝的心得：「我有同佢講，如果真係去參加，你有咩建議畀我。佢話最重要係保持好心情，將每一件事都當成學習同體驗，仲可以趁呢個機會識多啲朋友、學多啲普通話，都係一件好事。」提到節目拍攝日程緊湊，或要長時間離港，陳凱琳坦言最掛心屋企三個兒子，但亦早已做好心理準備：「我聽嘉穎之前講，節目好多時都係連續拍兩個星期先可以返香港，時間非常緊迫，到時候忙起上嚟，可能連同小朋友傾電話的時間都少咗，我會盡量遷就平衡。不過前提都係要先去到節目，我知道老公一定會好支持我，佢一直都係一個非常好的爸爸，屋企有咩事我都好放心交畀佢。」
講到今次出席活動的主題，陳凱琳就大方分享自己堅持多年的護齒習慣，她笑言自己除了早晚固定刷牙，出街一定會隨身帶備牙刷：「因為做呢行，好多時放飯食完就要即刻開工拍攝，我好希望保持牙齒靚之餘，健康都一樣重要。如果健康無咗，再靚都冇用。」她更指呢個習慣無形中都鼓勵到屋企三個小朋友：「佢哋見到媽咪都刷咁多次牙，就會主動話自己都要刷好啲牙。」
提到教小朋友刷牙的難題，陳凱琳坦言年紀最小的兒子一開始都有扭計，全靠全家出動給足情緒價值先順利解決：「我哋屋企成班都係演員，細仔刷牙扭計唔肯合作嘅時候，我哋就會一齊同佢鼓掌、歡呼，大聲話佢好厲害。佢聽到之後，就會覺得自己做咗件好犀利的事，爸爸媽媽哥哥都讚佢，就會願意乖乖刷多啲。」她又透露早前帶大仔去睇牙醫，發現有輕微牙肉發炎，反而成為了小朋友護齒的最佳教材：「佢之前話牙齒唔舒服，睇完先知係少少牙肉發炎。呢件事都係一個好警惕，等佢知道如果食完飯隨便刷兩下、臨瞓又唔再補刷一次，真係會導致口腔出問題。我都建議家長不妨帶小朋友定期做口腔檢查，等佢哋清楚自己口腔的情況，先會有動力主動做好護理。」
提到三個兒子的牙刷要不要特意分開顏色、款式，陳凱琳就笑言小朋友個個都有自己的主見，反而會藉呢件事培養佢哋的責任心：「佢哋自己會認住自己支牙刷，我哋會同佢哋講，呢支係你專屬的，要自己擺好，下次要用要記得放喺邊，等佢哋細細個就學會負責任。」而督促小朋友刷牙呢份工，她就同鄭嘉穎分工合作、相當合拍：「呢方面我哋好有默契，小朋友健康真係唔可以有半點疏忽，我哋兩個都會確保佢哋做好護理。如果我太夜未返屋企，就老公全權負責；我喺度嘅話就我嚟，有時兩個都會一齊睇住佢哋。」
提到早前鄭嘉穎陪大仔溫書的片段獲網民大讚「神級奶爸」，陳凱琳就甜認老公一直係個稱職的好爸爸：「好多網民都話，有幾多爸爸會清楚知道仔仔考試要背邊段文、默邊啲字，佢呢方面真係做得好好。加上佢知道我中文底子冇咁好，就主動擔起陪仔仔溫書呢個責任，我真係好感激佢。」
講到大仔的中文學習，陳凱琳就笑言兒子近來進步超大，更會主動向人展示自己的中文能力：「我個仔之前好鍾意講英文，有次有個姨姨喺升降機度話佢好帥，本來以為佢會講英文回應，點知佢突然講『謝謝你姨姨』，仲補多句『係啊，我仲會寫長壁同燈籠』，真係好好笑。」她指小朋友成長最需要的就係鼓勵：「如果你係佢身邊，真心話佢好厲害、識寫好難的字，媽咪好驕傲，佢就會記住呢份鼓勵，仲會更加想進步。」她又指學校的環境同氛圍都好重要，小朋友好容易被身邊環境感染，加上屋企人嘅全力支持，先會令佢哋真正享受讀書。
被問到有了大仔的經驗，會不會幫二仔同細仔揀同一類型的學校，陳凱琳就坦言要睇小朋友的個人特質：「未必會行同一個方向，不過呢個都係後話，仲有時間，而家就住先俾佢哋無憂無慮開心住。」早前細仔剛剛過完三歲生日，被問到會不會考慮追生多個小朋友，她就笑言而家最開心係見到三個兒子的兄弟情愈來愈好：「而家睇住佢哋三個一齊成長，見到佢哋嘅兄弟情真係好好。當然平時都會吵架、打架，不過我睇住佢哋由細就咁相處磨合，長大一定會成為最好的朋友，我都好放心。」
講到三個仔在家「開片」、有爭執的時候，她同鄭嘉穎會點樣收科，陳凱琳就直言會視情況而定，唔會隨便插手：「如果唔係去到好嚴重、冇辦法收場的地步，我覺得屋企係一個安全的地方，俾佢哋有呢啲糾紛同摩擦，等佢哋細細個就學識自己解決問題。始終去到出面，冇人會即刻走過來幫你解決矛盾，所以都係俾佢哋自己先處理。如果真係唔得，佢哋主動嚟搵我哋，我哋先會出手處理。」被問到會不會叫哥哥讓住弟弟，她就直言絕對唔會偏幫細路：「冇話一定要邊個讓邊個，都係睇件事本身係點樣處理最合適。當然唔會因為佢係最細嘅，就縱佢、所有嘢都俾佢，咁樣對大嘅兩個好唔公平。」TVB
