英皇娛樂25+周年慶典首批宣傳照公布.為慶祝英皇娛樂25+周年的大日子，英皇娛樂上星期正式公布，將於5月4日在啟德體育園主場館舉行「25+ 英皇群星演唱會」🎤。為咗令更多公眾可以參與其中，官方再加碼公布展開「英皇娛樂25+ HAPPY BIRTHDAY 慶典」，由3月中旬開始，推出一連串主題活動，陪大家重溫Cantopop的經典回憶。
今次慶典圍繞廣東歌同集體回憶殺打造，喺群星演唱會舉辦前後，多個主題活動接連登場🎉，包括：3月中旬首次登陸香港的DJ電車巡遊派對、3月下旬於香港美麗華酒店Vibes舉辦的「英皇盛世之夜」DJ派對；3月下旬至4月中旬於淺水灣灘畔商場the pulse舉行的「英皇娛樂25+嘉年華」；仲有4月至5月為期一個月、登陸香港地標星光大道的「英皇娛樂25+限定展」，現場除咗會設大型打卡裝置同多款限量藝人周邊商品，仲會不定期舉行Busking表演，以及以懷舊為主題的「英皇金曲巡迴Busking」。繼早前英皇娛樂的盲盒演唱會大獲好評之後，今次系列活動都會有唔同英皇藝人以盲盒形式輪流登場，仲會驚喜快閃向公眾派發禮物。
今次的《25+ 英皇群星演唱會》製作陣容十足，由劉偉強、張叔平、王雙駿聯手組成的黃金團隊全盤操刀，演唱會總投資額高達一億港元📸。同時為配合今次周年慶典，英皇娛樂特意邀請著名攝影師夏永康（Wing Shya）為旗下藝人拍攝全新宣傳照，夏永康分享：「今次整體風格偏向簡約樸素，以人出發，唔用繁複的背景，只配上皇冠頭飾。除咗象徵英皇娛樂，亦寓意每位藝人都憑住努力與才華，為自己加冕。」而藝人拍攝時穿著的T恤，就由演唱會美術總監張叔平親自操刀設計，T恤上的「EEG」三字簡潔又富有力量，橙色字體代表住活力，綠色流蘇就代表延續，盡顯品牌於香港以至亞洲樂壇的影響力。
首批發放的宣傳相片，就有謝霆鋒、容祖兒、古巨基同埋張敬軒四位重量級藝人，盡顯英皇大家庭的凝聚力。加盟英皇超過17年的古巨基，最近相隔23年重唱經典金曲，被網民大讚滿滿回憶殺，佢笑言：「諗唔到大家反應咁好，我會收集吓網民意見，睇吓大家想聽嘅歌單，自己會喺選歌上面花特別心思，希望可以畀大家帶來驚喜！」而加盟英皇大家庭即將滿14年的張敬軒就表示：「首先祝願公司25周年生日快樂！青春常駐！25周年代表銀禧，係一個好重要的里程碑，象徵住如銀般堅固，經得起時間考驗，25+的『+』代表延續，細水長流，穩中求變，時刻不斷畀大家新意同驚喜。能夠見證住公司走過四分之一世紀，真係十分感動！」
